Kultur- og kyrkjeminister Trond Giske under presentasjonen av Kultur- og kyrkjedepartementet sitt budsjett for 2010.

Budsjettauken er mellom anna knytt til etablering og drift av ein norsk språkbank, oppfølging av digitalisering av samlingane, vidareføring av prosjektet Bokhylla.no og utvikling av nasjonalt biblioteksøk. Med dette budsjettet er gjennomføringa av tiltak i bibliotekmeldinga og digitaliseringsmeldinga godt i gang.

- Vi er godt nøgde med budsjettframlegget. Det gjer oss i stand til å gjennomføre det auka ansvaret Nasjonalbiblioteket fekk gjennom bibliotek- og digitaliseringsmeldingane. I tillegg kjem det nye oppdraget som gjeld å etablere språkbanken, seier nasjonalbibliotekar Vigdis Moe Skarstein. - Desse oppgåvene er ei naturleg utviding av det mandatet Nasjonalbiblioteket har frå før og i samråd med relevante samarbeidspartnarar vil vi no leggje planar for å realisere oppdraget vi har fått, legg ho til.

Digitalisering
I digitaliseringsmeldinga blir det slått fast at Nasjonalbiblioteket er hovudaktør i digitaliseringsarbeidet på bibliotekfeltet, med eineansvar for nasjonale bibliografiske standardar og digital løysing for å søkje på tvers av alle bibliotek. Som det er skrive i meldinga, skal eit nasjonalt biblioteksøk gå inn som byggjestein i ei samla søkjeteneste for arkiv, bibliotek og museum. Til saman gjer regjeringa framlegg ein budsjettauke på 10 millionar kroner til følgje opp digitaliseringsmeldinga.

Språkbanken
Nasjonalbiblioteket vil få eit utvida ansvarsområde som følgje av regjeringa si språkmelding, St. meld. nr. 35 (2007-2008) Mål og meining – Ein heilskapleg norsk språkpolitikk. I denne meldinga vart det varsla at regjeringa i løpet av dei næraste åra vil byggje opp ein norsk språkbank. Departementet har gitt Nasjonalbiblioteket ansvar for å etablere språkbanken. 8 millionar kroner er lagt inn i løyvingsframlegget for 2010 til dette.

Nasjonalbiblioteket skal koordinere 100-årsmarkeringa for at Bjørnstjerne Bjørnson døydde. Auken for Nasjonalbiblioteket inneber òg ansvar for FIAF-kongressen i 2010 (The International Federation of film Archives).